चुनावमा ‘डन’ को सक्रियताः दिउँसो मन्त्रीलाई साथ, राति मुक्कामुक्की

नाम चलेका गुण्डा नाइकेहरु प्रतिनिधिसभा र प्रदेशसभाको उम्मेदवार नै बनेपछि उनीहरुका सहयोगीहरु चुनावमा परिचालित हुनु नौलो कुरा रहेन । तर, उम्मेदवारै नभएका ‘डन’ हरु गतिविधिले काभ्रे र सिन्धुपाल्चोकको निर्वाचन सुरक्षामा भने खतरा पैदा भएको छ ।

काठमाडौं लगायत अरनिको राजमार्ग क्षेत्रमा गुण्डागर्दीमार्फत चर्चा कमाएका गणेश लामा काभ्रेबाट प्रदेशसभाको उम्मेदवार बनेपछि काभ्रेली समूहका गुण्डाहरु प्रायः सबै सोही क्षेत्रमा केन्द्रित भएको जानकारी प्रहरीले पाएको छ । गणेश लामा समूहकै केही गुण्डा मेलम्ची क्षेत्रमा समेत देखिएको प्रहरी स्रोतले जनाएको छ ।

विशेष गरी पनौतिदेखि बाह्रबिसे क्षेत्रको राजमार्गमा गुण्डाहरुको बीचमा छिटपुट झगडाका घटनासमेत बाहिर आएपछि सतर्कता अपनाइएको प्रहरीले जनाएको छ । काभ्रेका प्रहरी प्रमुख सहकुल थापाले गुण्डागर्दीमा संलग्नहरुलाई निगरानीमा राखिएको बताए ।

यसपटक सिन्धुपाल्चोक १ र काभ्रे १ मा व्यवसायिक गुण्डाहरुको चलखेल बढी देखिएको छ । काभ्रेमा दोस्रो चरणमा चुनाव हुने भएकाले पनि काभ्रेली समूहकै गुण्डा सिन्धुपाल्चोकमा केन्द्रित भएका छन् । तर, प्रहरीमाथि राजनीतिक दबाब परेकाले चिनिएका गुण्डा नाइकेको गाडीमा समेत प्रहरीले खानतलासी गर्न सकेको छैन ।

सुकुटे सेन्टर

एक साताअघि अनलाइनखबरमा सिन्धुपाल्चोकको सुकुटेमा तरुण दलका कार्यकर्ताहरुले पिस्तोल टेबुलमा राखेर खानपिन गरेको समाचार सार्वजनिक भएको थियो । त्यो घटनाको केही दिनपछि अर्थात कात्तिक २४ गते शुक्रबार बेलुकी सुकुटेस्थित रिभर बे रिसोर्टमा बामपन्थी युवाहरु र तरुण युवावीच झडप भयो ।

बामपन्थी युवाहरु जलविरे ढाँडेमा प्रचार प्रसार सकेर बलेफी आएका थिए भने तरुण दलका कार्यकर्ताहरु पनि क्षेत्र नम्बर १ का विभिन्न स्थानमा प्रचार सकेर खाजा खानाका लागि सुकुटे आएका थिए । दुवै समुह सुकुटेको त्यो रिसोर्टमा बसेर अलग-अलग स्थानमा बसेर खाजा खाइरहेका थिए ।

तरुण दलको नेतृत्व गुण्डागर्दीका कारण पटक-पटक जेल परिसकेका सगुन श्रेष्ठले गरेका थिए । उनीसँग सानो सगुन श्रेष्ठ, हिमाल श्रेष्ठ, निराजन खडका, राहुल श्रेष्ठ, रोशन राईलगायतका २५/३० जनाको समुह थियो ।

बामपन्थी युवाहरुको नेतृत्व भने बलेफी गाउँपालिकाको युवा परिचालन समितिका संयोजक जलविरेका सूर्य खड्काले गरेका थिए । खड्कासँग मांखाका सुरज लामा, सुनकोशी क्याम्पसका स्ववियु सभापति लगायतको टोली थियो ।

सगुन श्रेष्ठ र सर्य खड्का एक अर्काबीच परिचित थिए । मदिराको नशा चढ्दै गएपछि खड्का र श्रेष्ठबीच विवाद भयो । सगुन श्रेष्ठले सूर्य खडकालाई तिम्रो सक्रियता धेरै नबढाऊ,नत्र जे पनि हुन सक्छ भने । सूर्य पनिले म तिम्रो आदेश मान्ने होइन, पार्टीको आदेश मान्ने व्यक्ति हुँ भने ।
विवाद बढेपछि खड्काले सगुन श्रेष्ठ र सानो सगुन श्रेष्ठलाई नजिकै रहेको किचनमा गएर गफ गरौं भन्दै लगे । अँध्यारो कोठामा पुग्नासाथ सगुनले बढी बोल्छस् भन्दै पिस्तोल तेस्र्याए ।

उनले पिस्तोल पड्काएनन् तर पिस्तोलको चुच्चोबाट खडकाको ओठमा घोचे ।

तस्वीरमा हेर्नुहोस् खडकाको पिस्तोलबाट घोचिएको दृश्य

पिस्तोलले घोचेपछि उनलाई श्रेष्ठ समूहले मुक्का प्रहार गरी रक्ताम्य बनाएको प्रत्यक्षदर्शीले बताए ।

सगुन श्रेष्ठले हतियार देखाएर आक्रमण गर्‍यो भनेपछि बाम समूहका युवाहरु भागे । आफ्नो टोलीमा रहेका सहकर्मीमाथि पिस्तोलले आक्रमण गरेपछि बाम युवा समूहका सुरज तामाङले अपशब्द प्रयोग गर्दै झम्टिए ।

त्यसपछि सगुन श्रेष्ठसहितको टोलीले सुरज लामामाथि पनि निर्घात कुटपिट गरेको थियो । मादक पदार्थले लठ्ठिएका श्रेष्ठले लामामाथि मुक्का र लठ्ठी प्रहार गरेको भिडियोमा देख्न सकिन्छ ।

रिसोर्ट प्रवेश गर्ने गेटमा रहेका भाटा उखेलेर तरुण दलका अर्का नेता हिमाल श्रेष्ठले वाम युवालाई आक्रमण गरेको भिडियोमा देख्न सकिन्छ ।
कुटपिटपछि तरुण दलका युवाहरु बेलुकी नै भागेका थिए ।

राजमार्गमा रहेका प्रहरीलाई घटनाको विषयमा जानकारी गराए पनि प्रहरीले वास्ता नगरेको पीडितहरुको भनाइ छ । दुई पक्षबीच भएको झडपमा तरुण दलका हिमाल श्रेष्ठ पनि घाइते भएका थिए ।

को हुन सगुन श्रेष्ठ ?

जुगल गाउँपालिका हगामाका श्रेष्ठको पृष्ठभूमि विवादास्पद रहेको प्रहरीले जनाएको छ । उनले अपराध लुकाउन बिभिन्न पार्टी चाहार्ने गरेको प्रहरी बताउँछ ।

सगुन पहिलो संविधानसभा ०६४ मा सगनु माओवादीमा प्रवेश गरेका थिए । त्यतिबेला हगामका विभिन्न बुथ कब्जा गरेर श्रेष्ठले माओवादी उमेदवार अग्नि सापकोटालाई जिताउन सहयोग गरेको एमाले कार्यकर्ता बताउँछन् ।

चुनावमा माओवादीलाई सहयोग गरे पनि अपराधिक पृष्ठभूमिका श्रेष्ठलाई माओवादीले खासै वास्ता नगरेपछि उनी रुष्ट भए । श्रेष्ठको समूहले बाह्रबीसेका गोविन्द थापाका छोरालाई अपहरण गरेर फिरौती असुल्न खोजेपछि माओवादीकै पहलमा श्रेष्ठविरुद्ध प्रहरीमा थापाले पहिलो पटक जाहेरी दिएका थिए ।

माओवादीसँग् रुष्ट भएपछि उनी एमाले र कांग्रेसको सम्र्पकमा पुगेका थिए । एमाले उनीसँग सकारात्मक नभएपछि काँग्रेस नेता मोहन बस्नेतको सम्र्पकमा पुगे ।

श्रेष्ठले विभिन्न ठेक्कापट्टामा २ देखि ५ प्रतिशतसम्म रकम असुलेर व्यावसायीहरुलाई दुःख दिने गर्थे । उनी अहिले निर्माण व्यवसायी संघ सिन्धुपाल्चोकका सह-सचिव र अहिले उपाध्यक्ष छन् । त्यो दुवै पदमा कसैले उमेदवारी दिए काटिदिने धम्की दिएपछि कसैले पनि उमेदवारी दर्ता गराएका थिएनन् ।

तातोपानी नाकाका व्यापारीहरुलाई धम्की दिने लगायतका गतिविधि गरेपछि मोहन बस्नेतले श्रेष्ठलाई च्याप्न छाडेका थिए । तर, कांग्रेस जिल्ला सभापति विकास लामा लगायतको साथ पाएपछि उनी तरुण दलका केन्द्रीय सदस्य समेत भए ।

जलविरे आसपासका विभिन्न योजनाहरुमा ठेकेदारहरुलाई धम्की दिएर रकम असुल्ने गरे पनि उनी विरुद्ध कोही पनि बोल्न सक्ने अवस्थामा थिएनन् ।

पाङताङ घर भएका स्थानीय जीवन श्रेष्ठलाई ०७० फागुन १२ गते राति बन्दुक देखाएर अपहरण गरेपछि श्रेष्ठले सगुनको विरुद्ध उजुरी दिएका थिए ।

सुगनसहित १२ जनाको समुहले गाउँबाटै जीवनलाई अपहरण गरेर निर्धात कुटपिट गरेका थिए । अपहरणकै भोलिपल्ट जीवनले श्रेष्ठसहित अन्यका विरुद्ध प्रहरीमा जाहेरी दिएपछि अन्य पाँच जना पक्राउ परे पनि श्रेष्ठ भने फरार रहेका थिए ।

फरार सुचीमा नै रहेको बेला सिन्धु प्रहरीले ०७१ साल कात्तिक १७ गते श्रेष्ठ र उनका सहयोगी प्रेमलाल श्रेष्ठलाई प्रक्राउ गरी अदालतमा बुझाएको थियो । पुर्पक्षमा नै रहेका बेला अदालतमा मुद्दा कमजोर भएपछि उनी केही समयमा नै जेलबाट रिहा भए ।

रिहा भएपछि उनी कांग्रेस नेता बस्नेतसँग रुष्ट हुँदै आएका थिए । अहिले बस्नेतसँग उनी निकट भएको धेरै समय भएको छैन । तरुण दलको जिल्ला अध्यक्ष बनाउने आश्वासनपछि बस्नेतसँग श्रेष्ठ नजिकिएको स्थानीय बताउँछन् ।

अहिले सगुन सूचना तथा सञ्चारमन्त्री समेत रहेका बस्नेतको अंगरक्षकजस्तै भएर हरेक चुनावी सभा र घरदैलोमा देखिने गरेका छन् ।

हामीले मोहन बस्नेतको चुनावी कार्यक्रमको रिपोर्टिङ गर्ने क्रममा सगुनलाई मन्त्रीको दायाँ वा बायाँ उभिएको अवस्थामा देख्यौं ।

मन्त्री बस्नेत भन्दा पछाडि सगुनको स्कारपियो गाडीको सवारी चल्ने गरेको छ । अपराधिक पृष्ठभूमिका व्यक्तिलाई लिएर हिँडेको बारे बस्नेतलाई सोध्दा उनले भने- ‘मसँग हिँड्नेहरु ठूला तिघ्रा भएका छन् । उनीहरुलाई मैले विभिन्न काम दिएको छु । केही परेमा उनीहरुको जिम्मा पनि मैले लिन्छु भनेको छु ।’

के भन्छ प्रहरी ?

अनलाइनखबरमा हतियारसम्बन्धी समाचार प्रकाशित भएपछि प्रहरीले सुकुटे आसपासका केही होटलहरुमा सर्चसमेत गरेको थियो । गत शुक्रबार रिसोर्टको घटना सामान्य भएको जिल्ला प्रहरी कार्यालय सिन्धुपाल्चोकका प्रहरी प्रमुख एसपी मोहनप्रसाद पोखरेलले बताए ।

‘हामीले घटना थाहा पाएपछि रिसोर्टमा गएका थियौ, सबै हिँडिसकेछन्, सबैसँग बुझ्दा मादक पदार्थ सेवनपछि भएको घटना रहेछ,’ एसपी पोखरेलले भने ।

प्रहरीले दुवै पक्षलाई मिलाउने प्रयास गरिरहेको पोखरेलले बताए । बामपन्थी समूहबाट ज्यान मार्ने उद्योगमा मुद्दा दर्ता गर्नुपर्‍यो भनेर आए पनि सामान्य घटना भएकाले मुद्दा दर्ता नगरिएको उनले प्रतिक्रिया दिए ।

होटलमा गएर बुझदा पनि होटल सञ्चालकले घटना खासै केही नभएको बताएपछि आफूहरु र्फकेको एसपी पोखरेलले बताए ।

ज्यान मार्ने उद्योगमा मुद्दा दर्ता गर्न नमिल्ने भएपछि सार्वजनिक अपराधमा मुद्दा दर्ता गर्न माग गर्दै पीडितहरु र्फकेको पोखरेलले बताए । आफूहरुले प्रहरीको सूचीमा रहेका केहीलाई निगरानी गरिरहेको उनले जानकारी दिए ।

तर, सगुन श्रेष्ठको गाडी कतै पनि खानतलासी नगर्नु भनेर प्रहरीको सबै युनिटमा सञ्चार मन्त्री बस्नेतले निर्देशन दिएको स्रोतको दाबी छ ।

यो सामग्री अनलाईन खबर बाट साभार गरिएको हो !

प्रतिक्रिया दिनुहोस्

%d bloggers like this: